Asteburu honetan amaituko da aurtengo denboraldia Viveros San Anton-Exclusivas Mardu-Gora Aseguruak taldearentzat; Azpeitian eta Antzuolan jokatuko dira junior mailako Gipuzkoako Egutegiko lasterketak, eta bertan Eneko Aranguren izango da taldeko ordezkari bakarra; beste guztiek bukatutzat eman dute denboraldia arrazoi ezberdinengatik (nekearen zama, osasuna, denboraldi berrirako plangintza...)

Urteak zeramatzan Pulpo Eskubaloi Klubak emakumezkoen senior talderik gabe, taldekideen falta zela eta. Aurtengoan, ordea, taldea osatzea lortu dute eta Gipuzkoako lurraldeko senior mailako ligan izango dira. Taldeko jokalarietako bi dira Naroa Usabiaga (Zumaia, 2004) eta Jone Adrian (Zumaia, 1998), biak zumaiarrak. Usabiagak ez dio inoiz eskubaloian jokatzeari utzi, baina Adrian kirol honetatik aldenduta egon da azken zazpi-zortzi urteetan. Datozen partiduak prestatzen dabil dagoeneko taldea, eta elkar ezagutzearen eta itzuleraren inguruan mintzatu dira biak elkarrizketan.