Irekidura luze eta estu batzuei esaten diegu “xirrikitu” edo “zirrikitu” Zumaian eta inguruan. Ia itxita dagoen ateak uzten duen tarteari hala esaten diogu, esaterako. Abelin Linazisorok “xirrikitu” jaso zuen zerrendan eta Maria Antonia Goikoetxeak ere hala esaten du; Brigida Ibarbiak eta Arantxa Aizpuruak, berriz, “zirrikitu” erabiltzen dute. Antzeko beste hitz batzuk ere badaude: zirriztu, zirritu, zirriku, zirrikistu, intzirritu, txirrikito... Oso antzeko da zirrimizta ere, borda eta antzeko etxetxoetan egoten diren leiho txikiei deitzeko erabiltzen dena.
Zestoarren erretolika liburuan ere jasota dago gaurko hitz hau, eta adibide hauek ematen ditu:
- Atian zirrikitutik sartze zan euzkiya.
- Tajuz egurrakin indakuak, neguko haize hotzak xirrikitutik bilatzen ez duala barrukuak dardaraz jartzeko.