Duela bost urte hasi zen Garbiñe Arrieta San Juan Iturriko lokalera (Harategi kalea,17) joaten, eta Iñaki Oreja, aldiz, duela hiru urte. Biek margotu dute han ordutik, eta azkenean, arte estudio bihurtu dute lokala: IGart Studio. Aste Santuan ireki zituzten ateak, eta gaur egun ere han daude ikusgai bien margolanak.
Sarreran daude Orejaren lanak, kolorez beteta egon ohi direnak, eta sotoan kokatu dituzte Arrietarenak, erretratuak horietako asko. Bi artistek jakinarazi dutenez, estudioa egunero dago zabalik; astelehenetik igandera. Interesdunak 11:00etatik 12:30era edo 16:00etatik 19:00etara bitartean joan daitezke erakusketa iraunkorra ikustera.