Iaz %28,19ra igo zen Zumaian errenta aitorpena euskaraz egitea eskatu zutenen ehunekoa

Azken zortzi urteetan gora egin du errenta aitorpena euskaraz egitea galdegiten dutenen kopurua. Zumaiako Udalaren eta Uemaren helburua da aurtengo portzentajea %30era heltzea.

2012. urtetik igo egin da errenta aitorpena euskaraz egitea eskatzen duten zumaiarren kantitatea. Duela bederatzi urte, 2012an, aitorpena egin zutenen %18,9k eskatu zuten euskarazko zerbitzua, eta azkeneko datuen arabera, 2020an %28,19 izan ziren izapideak euskaraz egin zituztenak.

Zumaiako Udalak eta Uemak errenta aitorpena euskaraz egiteko kanpaina izan dute martxan aurten ere. Azaldu dute helburu argi bat finkatu dutela oraingoan: 2021ean %30era iristea euskarazko zerbitzura jotzen dutenen ehunekoa.

Gogorarazi dute hiru bide daudela errenta aitorpena egiteko: autolikidazio proposamena, mekanizatua eta internet bidezkoa. Hiru moldeetan eskatu daiteke euskarazko zerbitzua. Aurten, gainera, Zergabidea plataforma sortu dute Gipuzkoan, aitorpena Internetez egiteko. Ekainaren 30era arteko epea dago izapideak egiteko.

Erlazionatuak

'Online' bideen hedapenari heldu dio aurten ere 2020. urteko errenta kanpainak

ekonomia

Internet bidezko errenta zerga kanpaina sustatu nahi du Gipuzkoako Ogasunak Zergabidea tresnaren bitartez, baina aurrez aurreko zerbitzua ere eskai...
Errenta aitorpena euskaraz egiteko kanpaina jarri du martxan Zumaiako Udalak, Uemarekin elkarlanean

Euskara

Urtez urte, gora egin du errenta aitorpena euskaraz egin duen herritarren kopuruak. Euskarari bide berriak zabaltzeaz gain, administrazioa euskaldu...