Udal Gobernuaren helburuetako bat da, Zumaian lanpostuak sortzea, zumaiarrak Zumaian lan egiteko aukera izan dezaten. Berri hau, beraz, Udalarentzat kolpe gogorra da, Zumaiako familia askori eragiten baitie, eta kezkatuta dago lanik gabe gelditzera doazen pertsona horien egoerarekin.
Zentzu horretan, Oier Korta alkateak adierazi du “langileentzako soluziorik egokiena bilatzeko gure esku dagoen guztia egiten jarraituko dugu”. “Aspaldian lanean aritu gara eta gure eskumenak iristen diren punturaino ahal genuen guztia egin dugu berri txar hau ekiditeko, zoritxarrez, ez da posible izan. Baina, orain arte bezala, gaiaren gainean egongo gara eta egoerari ahalik eta irteera egokiena bilatzen saiatuko gara. 170 familia horien alboan egongo gara”.
