Zintzilik, esekita edo dilindan esateko erabiltzen dugu Zumaian “txintxilik” edo “txintxilika”. Beste herri batzuetan antzekoak erabiltzen dira: zintzilizka, zintzilaka, zintzilikotz… Ez da Zumaiako kontua bakarrik, Gipuzkoako hainbat herritan ere erabiltzen dela ikusi dugu ahotsak.eus gunean: Abaltzisketan, Gabirian, Getarian, Azpeitian, Errenterian, Donostian, Zarautzen…
Gune horretan bertan agertzen dira Zumaiako bi adibide hauek:
Geo, kañabera baten eo kaña baten, kañabera o burni tubo baten eo, txintxilik. Hor jartzen nin, ta han’e bai, hor gaiñian’e bai, han, soka jarrita. Barilla bat jarri ta han txintxilik burutik.
Guk ibiltzen gendun jolasak eta egurrakin indako zeak, txintxilikako kamioi hoiek ya, ez ditxuk, ez ditxuk ya esistitzen
Baleike aldizkarian topatu ditugu beste hauek:
- Itziar Treku, 1998ko apirilean
Sariak ta izariak, jarri baztar danetan, sariai batel aundixa jarri ta, antxoak txintxilika zitula ta...
- Luis Mari Goikoetxea, Aita Mari elkartearen 25. urteurrenean (2000)
1978tik ez dugu trainerua sekula txintxilikatu
- Abelin Linazisoro, 2009ko apirilean
Ta han [Mertzedarioetan] euskeraz berriketan ai nitzala hartu, ta akordatzen nauk nola hartu niñun belarritatikan, esku banakin helduta, altxa, ta horrela eduki niñun txintxilika, eskerrak txikixa ta flakua nitxan,
Abelin Linazisorok berak Baleike aldizkarian “Gure Zumai zarra” atalean egindako elkarrizketetan adibide asko topatu ditugu:
- Irene Yeregi, 2007ko martxoan
Akordatzen nax Orruatik Kamiño Etxeko tarte horretan bide ertzian nola eiten zan erreka txiki bat bezelakoa menditik behera txintxilika belar puntetatik ur tantunak eroitzen zialako metro erdi baten alturatik-edo.
- Alizia Perez, 2008ko ekaina
Han gerran, mendixan hiltzen zian, bai batekuak eta bai bestekuak, eta hildakuak mando gainetan jexten zituen hankak txintxilika zituela, plon, plon, zapatak kendu gabe
- Karmelo Zendoia, 2007ko abendua
Merkantzia zahar baten txintxilika jarri ittuk bi hoixek eta hurrengo estazixuan harrapatu zien gure trena.
- Kontxita Uranga, 2009ko martxoan
Gosia galanta ginien garai hartan, eta txarrixa behar bezela jarri dik gure amak, urdaxak gatzetan eta urdaiazpikoa, atziak bixak baten bat etortzen bazan-eo, jarri itxik txintxilika kuartu batian.