Mozorroen festa izan zen pasa den asteburuan Zumaian, Inauterien aitzakian. Azken urteotan egin bezala, argazki txokoa egin zen Alondegiko Oxford aretoan. Han ateratako argazkiak baleike.eus webgunera igo ziren, eta erabiltzaileek emandako botoen bidez erabaki da zer mozorrok jasoko duten Inauterietako mozorro lehiaketako herritarren saria.
Hala, boto gehien jaso dituzten mozorroak Munduaren elur bolak izanda dira taldekako lehiaketan, eta Rocket man banaka edo binakakoan. Lehenek, Gertu merkatarien elkarteak emandako 200 euroko erosketa txartela jasoko dute; bigarrenak 80 euroko txartela. Antolatzaileak harekin jarriko dira harremanetan.
Kartel lehiaketako herritarren saria
Inauterietako egitaraua iragartzeko kartel lehiaketa antolatu du aurten ere Zumaiako Udaleko Kultura Sailak. Lehiaketaren irabazlea Iolande Ostolaza izan zen. Herritarren saria erabakitzeko, berriz, lehiaketara aurkeztutako kartel guztiak Alondegiko sarreran jarri ziren, eta han izan zuten herritarrek beraien gogokoena aukeratzeko parada. Hala, herritarren sariaren irabazlea Ane Azkue izan da hemen ikus daitekeen kartelarekin.
