Emakumezkoen estropadak izan ziren jokatzen lehenak. Arraun Lagunak eta Hondarribia aritu ziren lehen txandan, eta Zumaia eta Zarautz bigarrengoan. Emakumezkoen banderaren irabazlea Arraun Lagunak izan zen, 11:41,21 denborarekin. Bigarren Hondarribia sailkatu zen (11:55,12), Zumaia hirugarren (12:05,06) eta Zarautz laugarren (12:13,58).
Gizonezkoen hiru txandak jokatu ziren ondoren. Berdintasun handia izan zen txanda bakoitzeko irabazleen artean: Orio irabazlearen eta hirugarren sailkatu zen Hondarribiaren artean bi segundoko aldea besterik ez zen izan. Gizonezkoen sailkapena hau izan zen:
1. Orio: 10:19,12
2. Getaria: 10:20,48
3. Hondarribia: 10:21,06
4. Zumaia: 10:34,99
5. Zarautz: 10:35,58
6. San Pedro: 10:56,82
Zozketako zenbakiak
Ohikoa duen bezala, Telmo Deun Arraun Elkarteak zozketa egin du jai hauetan ere. Estropadaren ondoren atera zuen zenbaki sariduna: 03728. Txartelaren jabea arraun elkarteko zuzendaritzarekin jar daiteke harremanetan. Epe batean agertzen ez bada, saria ordezko zenbakiarentzako izango da: 00421.