Elkartasunerako garaia izaten da Gabonetakoa. Horren jakitun, Zumaiako Udal Musika Bandak kontzertu solidarioak ematen ditu urte amaierarekin batera. Musika entzuteko aukera izateaz gain, bertaratzen direnei, ahal duten neurrian, elkarte jakin bati diru laguntza bat ematera gonbidatzen zaie. Iaz Saharako errefuxiatuen alde lan egiten duen Darahli elkartearen aldeko emanaldia izan zen; aurten, berriz, Zumaiako Errefuxiatuen Harrera Taldea izango da, Bandaren bitartez, zumaiarren laguntza hau jasoko duena. Emanaldia ostiral honetan izango da, 20:00etatik aurrera, Alondegiko Oxford aretoan.
"Ikusi dugu Gabonetako kontzertu hau aitzakia ona dela errefuxiatuen gaia plazaratzeko", adierazi du Jose Mari Azkuek, Bandako zuzendariak. "Ikusten genuen zerbait egin behar genuela errefuxiatuen gai honekin eta hauen alde lan egiten duen taldea laguntzea egoki ikusi genuen".
Errefuxiatuen Harrera Taldeko kideak, Zumaian bertan lan egiteaz gain, Mediterraneoan egon izan dira errefuxiauei laguntzen. Konkretuki Chios irlan izan ziren, Zaporeak proiektuari laguntzen. "Agian ez da izango herriko beste elkarte batzuk bezain ezaguna, baina sekulako lana egiten ari dira eta, gainera, badakite diru laguntza hori non eta nora bideratu", gaineratu du Azkuek.
Hala, kontzertuan zehar, taldekide batzuek elkarte honek egiten duen lanaren berri emango dute eta, amaieran, izango da diruz laguntzeko aukera. "Edozer laguntza ongi etorria izango da. Gogoratu behar da euskaldunok ere errefuxiatuak izan garela historian zehar".
Gabon abestiak
Aspaldiko partez, Gabon abestiez osatutako kontzertua emango du Bandak. Jatorri desberdineko abesti ezagunak joko dituela adierazi du zuzendariak: "White Christmas, Jingle Bells... Alemaniako abestiren bat izango da, Frantziako bat eta baita euskaldun bat ere".