Nire geltokira iritsi —trena aldatu behar nuen— eta bagoitik atera nintzen, haiek guztiak atzean utziko nituelakoan. Baina koitadua ni. Badirudi geltoki hura Colón plazatik gertu dagoela —idearik ez nuen— , eta konturatzerako jendartearen erdian harrapatuta nengoen, piperpoto artean. Jendea ateratzen ari zen argazkietan ez agertzeko, burua makurtu eta aurkitutako zirrikitu guztietatik ihes egitea lortu nuen. Bost bat minutuko kontua izango zen, baina betierekoa egin zitzaidan.
Albisteak irakurtzean lasaitu nintzen, ez dira hainbeste ezberdin pentsatzen dutenak kartzelan nahi dituztenak. Halere, gehiegi dira, eta boterean daude.