Eire Mayak eta Eire Salegik osatutako Eire bikoak hankaz gora jarri zuen Oikia joan den ostiralean. Sanbartolomeetako egitarauaren barruan kontzertua eskaini zuen gauean Zestoako Manitu taldearekin batera eta jende andana gerturatu zen Zumaiatik eta inguruko herrietatik. Bi zumaiarrak gustura aritu ziren agertokian haien zaleen aurrean.
San Bartolome jaietako bigarren egunean eskaini zuen Eirek bere kontzertua eta gaur ere izango da zer egina Oikian; izan ere, jaietako azken eguna dute: Mozorro Eguna. Eguerdian abiatu dituzte ospakizunak eta paella jana izango dute aurki. Arratsaldean, berriz, jolasak izango dituzte eta Ostolaza eta Larrañaga trikitilariak girotuko dute gaua. Gauerdian berriz, txin-txin herrikoia egingo dute sanbartolomeak datorren urtera arte agurtzeko.