Txori ezagun eta hedatuenetakoa da, baina bere arazoak ere baditu pinu, eukalipto eta pestiziden erruz. Ar eta emeen artean ez dago desberdintasun handirik, eta beste izen batzuk ere baditu: burubeltz urdin, kaskaurdin, sagartxori, tximutx, pinpingarratx, bururdin… Euskal Herrian lurralde guztian zehar ikus daiteke, normalean kumatzen duen ingurunean igarotzen baitu urte guztia. Udaberri hasierarako, bikotea elkartzean, lan banaketari ekiten diote: emearen lana izango da kabia egin eta arrautzak inkubatzea. Arrak, berriz, lehiakide diren beste txoriak lurraldetik uxatzeari ekingo dio, eta emea elikatzeaz arduratuko da. 6-12 arrautza jartzeko gai dira.
Luzera eta hego zabalera: 11-12 zentimetro eta 17-20 zentimetro.