Zumaian dira Olatz Beobide, Nerea Arriola eta Maitane Perez aktore eta sortzaileak. Izan ere, euskalduntasunaren, erruaren, euskal identitatearen eta "euskal irriaren" inguruko obra sortzen ari dira. Udalbiltzak sustatutako Geuretik Sortuak ekimenaren barruan ari dira garatzen beren lana, eta zumaiarren kontakizunak oinarri hartuta, antzezlan bat sortuko dute.
Emakumeon* Etxean egingo dute lehen saioa, bihar, 10:30etik 12:30era bitarte. Sortzaileen esanetan, "kontakizunak elkar ezagutu eta trukatzeko tresna dira, ahozko transmisioaren bidez besteengana gerturatzeko modua". Jolas eta dinamiken bitartez, parte hartzaileek kontakizunak partekatuko dituzte. Dibertitzea eta goiz ezberdin bat elkarrekin pasatzea izango da helburua, kontuak gora eta behera, istorioetan murgilduz eta haiekin gozatuz. Tailerra euskaraz izango da, eta emakumeei* zuzenduta dago.