Partida bakarra geratzen da jokatzeko Jai Alai Winter Series txapelketan. Iñaki Osa Goikoetxeak eta Nicolas Etchetok osatzen duten bikotea Jon Tambourindeguyren eta David Minvielleren aurka arituko dira Gernika Jai Alai frontoian. Partida 19:30ean hasiko da, eta ETBko lehen kateak 22:25etik aurrera emango du.
Dagoeneko erabakita dago zer lau bikotek jokatuko dituzten txapelketako finalerdiak: Olharan-Basque (iazko irabazle Erkiaga-Zabala bikotea kaleratu zuten aurreko jardunaldian) eta Barandika-Lekerika A multzotik, eta Goikoetxea-Etcheto eta Beaskoetxea-Imanol Lopez B multzotik.
Gaur gaurkoz azken bi bikote hauek puntuetara berdinduta daude B multzoan. Biharko partidan erabakiko da zer bikote pasatuko den multzoko lehen postuan. Goikoetxea eta Etcheto dira partida irabazteko faboritoak, aurkariek jokatutako bi partidak galdu dituztelako.
Finalerako sarrerak agortuta
Oraindik ez dira jokatu txapelketako finalerdiak, baina dagoeneko salgai jarri dituzte finalerako sarrerak, baita hamar minutuko epean agortu ere. Txapelketa arrakastatsua suertatzen ari da Gernikan antolatutakoa.