Errege Egunaren bezpera da gaur, osteguna, eta Meltxorrek, Gasparrek eta Baltasarrek ez dute hutsik egin. Magiaz eta ilusioz beteriko desfilea ekarri dute Zumaiako kaleetara, itsasontziak itsas kiroldegiko pantalanean geldialdia egin ondoren.
Patxita Etxezarretan barrena hasi dute kabalkada karrozetara igota, pajeen laguntzarekin, eta Txomin Agirre kaira jo dute gero. Ordurako etxeko txikienak Errege Magoen zain zeuden, eta magiaz eta kolorez beteriko desfilea iristearekin batera, karamelu ugari jaurti dizkiete.
Pulpo parean buelta eman eta Erribera kalean sartu da jarraian kabalkada, Beheko plazako jaiotzara bidean. Amaieran, Zuloaga plazatik eta Zubitxikitik barrena, Etxezarreta kalera heldu dira eta handik itsas kiroldegi parera bueltatu dira aurtengo desfilea amaitzeko.