Eguraldia lagun izan ez bazuten ere, hogei bat lagun bildu ziren Biotopoan bertan Gipuzkoako Foru Aldundiak duen mendi publikoko 1,5 hektareako lursaila basoberritzeko. "2014. urtetik geroztik partzela hura betetzen joan gara eta iaz lan hauek bukatzeko asmoa bagenuen ere, tamalez, osasun egoera zela eta, itxialdia erabaki zen eta egin beharrekoak bertan behera utzi behar izan genituen", azaldu dute Geoparkeko kideek.
Igande goizean egindako landaketan 80 bat zuhaitz landatu zituzten. "Zuhaitzak zuzen hazteko tutoreak jarri ditugu eta aurreko urteetako hainbat zutoin bere onera ekarri ditugu. Baso berrian, arteak, haritzak, gurbitzak, gorostiak eta elorri zuriak landatu ditugu".
Antolakuntzatik eskerrak eman nahi diezkiete bertaratutako guztiei, "euria eta haizeari muzin eginez, auzolanean lana egiteko agertu duten prestasunagatik".