Kasu positibo bakarra zenbatu dute Zumaian ostiraletik igandera bitartean

Eremu horian dago Zumaia, 213,70eko tasarekin. Azken datuekin baieztatu da Urola Kostan ez dagoela eremu gorrian dagoen herririk. 

Eusko Jaurlaritzaren Osasun Sailak azken hiru egunetako positibo kopuruen emaitzak plazaratu ditu, eta azken asteetako daturik baikorrenak izan dira Zumaian. Izan ere, ostiraletik igandera bitartean kasu positibo bakarra zenbatu dute herrian egindako PCR eta antigeno probetan. Zumaia eremu horian dago, 213,70eko tasarekin.

Urola Kostako herrietan, berriz, hamabost herritarrek bakarrik eman zuten positibo, joan zen asteko asteburuan baino bederatzi pertsona gutxiagok, hain justu. Daturik esanguratsuena da gaur-gaurkoz ez dagoela eskualdeko herririk eremu gorrian.

Azken hiru egunetan positibo gehien Zarautzen hauteman dituzte, zazpi —ostiralean bi, herenegun hiru eta atzo bat—, eta 100.000 biztanleko hamalau egunetako tasa 316,9 da uneotan. Joan zen astelehenean 329,81eko tasa zuten herri hartan; beraz, tasak apur bat behera egin du astebetean. Kasurik gehien zenbatu dituzten eskualdeko bigarren herria Azpeitia izan da; ostiralean kasu bat zenbatu zuten, larunbatean bi eta atzo bat ere ez. Astebetean nabarmen egin dute behera positiboek Azpeitian, eta gaur-gaurkoz 420,50eko intzidentzia tasa dute. Joan zen astelehenean 873,85ekoa zen tasa, eta eremu horrian zegoen herria; beraz, jaitsiera agerikoa izateaz gain pozik egoteko moduan dira azpeitiarrak, hainbat aste eremu gorrian egon ostean eremu laranjara igaro baitira.

Orion ere duela astebete baino emaitza baikorragoak izan dira; izan ere, hiru egunetan kasu bakarra zenbatu dute bertan. Eremu gorritik laranjara igaro da Orio ere, eta gaur-gaurkoz 472,93 da hango intzidentzia tasa. Beraz, nabarmen jaitsi da tasa astebetean, joan zen astelehenean 1.288,32koa baitzuen.

Azken hiru egunetan kasu positiboak egon diren beste herriak Azkoitia, Errezil eta Zestoa izan dira. Herri horietan positibo bana zenbatu dute ostiraletik igandera bitartean. Azkoitia da eskualdeko 5.000 biztanletik gorako herrietan intzidentzia tasarik baxuena duen herria; 166,90 da hango tasa eta eremu horian dago. Zestoan 487,93ko tasa dute eta Errezilen 161,03koa. Aian, Aizarnazabalen Beizaman eta Getarian ez da kasurik izan azken hiru egunetan.

Hego Euskal Herrian, argia

Osakidetzak eta Osasunbideak emandako datuen arabera, Hego Euskal Herrian ere positiboen kopurua beheranzkoa izan zen atzo. Araban, Bizkaian eta Gipuzkoan, guztira, 418 kasu zenbatu zituzten, horietatik 270 Bizkaian izan ziren, 91 Gipuzkoan, 51 Araban eta sei hiru lurralde horietatik kanpo. Guztira, 7.550 PCR eta antigeno proba egin zituzten atzo hiru lurralde horietan, eta positibotasun tasa %5,5ekoa da. ZIUetan, berriz, 170 pertsona daude ospitaleratuta gaur-gaurkoz, eta, atzo, 38 ospitaleratze izan ziren Osakidetzan.

Nafarroan, berriz, 1.202 PCR eta antigeno proba egin ziren atzo eta 48 pertsonak eman zuten positibo. Joan zen uztailaren 30etik lurralde historiko horretan hautematen duten daturik apalena da atzokoa, eta %4ko positibotasun tasa dute uneotan.