Udako hiru hilabetetan izaten da indarrean TAO sistema herrian, Ardantzabiden izan ezik. Auzune horretan urte osoan dago aparkamendua arautzeko sistema, eta horretak herriko beste auzune eta kaleetan ez duten kuota ordaindu behar izaten dute bertako bizilagunek. Herritar hauek kexu agertu dira sarritan, aparkatzeko kuota ordaindu bai, baina autoa uzteko lekurik aurkitzen ez dutelako.
Udalak iragarri berri duenez, eremu hau urte osoko TAO eremutik kanpo ateratzea aurreikusten du. Hala, prestatzen ari diren aparkalekuen araudi berrian aldaketak egitea aurreikusten du Ardantzabiden: eremua urte osoan araututa egon beharrean, udako aldian soilik arautzea planteatzen du udalak.
Hori horrela izanik, horri lotutako urte osoko tasarik ez kobratzea erabaki du udalak. Helbideratu gabe dutenek ere ez dute ordainketa egin beharko. "Eremu horretako bizilagunek udako aldirako txartela eskuratzeko gainontzeko herritarren prozedura berdina jarraitu beharko dute", iragarri du.