Koronabirus kasuen igoerak argi gorri guztiak piztu ditu Zumaian. Egunean bat, bi edo hiru kasu izatetik, 20tik gorako zenbakietara pasa da herria hamar eguneko bueltan. Azken datuen arabera, 46 kasu positibo zenbatu ziren herrian ostiraletik igandera bitartean, eta 100.000 biztanleko azken hamalau eguneko intzidentzia tasa 1.500era heldu zen.
Egoeraren jakitun, 13 eta 40 urte arteko herritarrei zuzendutako baheketa selektiboa antolatu du Osakidetzak. Gaur arratsaldean egin zen lehen saioa, eta asteazkenera bitartean 3.000 zumaiar daude deituta PCR probak egitera –kontutan hartu behar da 13 urtetik gorako ikasleek ikastetxeetan bertan egingo dituztela probak–. Zumaiako osasun zentrora (943-00 64 90) edo Osasun Aholkuaren telefono zenbakira (900-20 30 50) deitu behar dute herritarrek izena emateko, eta Osakidetzako arduradunek esandakoen arabera goiz partean eskaerak erantzun ezinik izan dira. 900 lagunek eman zuten izena lehen egun honetan.