Jubenil mailako 153 txirrindulari bildu dira irteera puntuan, 83 kilometroko bideari ekiteko. Eskualdeko errepideetan zehar aritu dira txirrindulariak, eta bitan igo behar izan dute Meaga Axular ibiltokian kokatutako helmuga puntura heldu aurretik.
Abiada handian korritu da karrera. Horren erakusgarri da irabazleak lortutako bataz-bestekoa: 40,731 kilometro orduko. Ez dira ihesaldiak falta izan, eta horietako batek lortu du helmugaraino heltzea, azkenean sakabanuta iritsi badira ere. Azken metroetan Quesos Albeniz taldeko Unai Aznar heldu da lehena, 2:02,16 denborarekin. Bigarren Aimar Erostarbe (Ulma) heldu da, denbora berarekin, eta hirugarren Danel Casais (Ulma), irabazlearekiko hamar segundora. Laugarren Igor Arrieta (Sakana Group) izan da, eta bosgarren Asier Pozo (Buruntzazpi).
Aznarrek irabazi du, baita ere, mendiko saria; tarteko helmugako saria, berriz, Arkaitz Garmendiak (Limusin) jaso du. Joxe Mari Kortaren bidetik fundazioak ematen duen taldekako saria, aldiz, Ulma taldeak irabazi du.
