Siemens Gamesak hamabost langile kaleratzeko asmoa jakinarazi dio enpresak Oikian duen lantegiko batzordeari, ELAren arabera. Langileek txanda bakoitzeko bi orduko lanuzteak deitu dituzte hilaren 23an hasi eta abuztuaren amaierara arte, enpresaren erabakia atzera botatzeko. Goizeko txandan 08:00etatik 09:00etara eta 12:00etatik 13:00etara egingo dira lanuzteak, eta arratsaldekoan 15:00etatik 16:00etara eta 19:00etatik 20:00etara.
Enpresaren errealitatea aintzat ez hartzeaz gain, "neurriz kanpokoa" da kaleratze horiek egitea, sindikatuak azaldu duenez: "Enpresak tresna legal batzuk ditu egoera hori aurre egiteko. Ez da inondik inora ere egiturazkoa". Gaineratu du enpresa batzordea alternatibak bilatzen saiatu arren enpresak uko egin diola "kaleratze traumatikoak" ez diren ezeri buruz hitz egiteari.
LAB sindikatuak ere gogor salatu du enpresaren jarrera. Beraien esanetan, "jazarpen sindikalaren" adibidea da enpresa honetan gertatzen ari dena. "Kaleratzeen aurka mobilizatu dira Guascorreko langileak, eta bitartean, zuzendaritzak argi utzi du edozein hariri tiratzeko prest dagoela enpresa-batzordea beldurtzeko".