Getarian hasi eta amaituko den III. Euskal Kosta Krosak eragina izango du bihar bai trafikoan bai garraio publikoan ere. Hala, N-634 errepidea itxi egingo dute Zarauztik Zumaiara, bi noranzkoetan, 16:00etatik 19:00etara. Horrenbestez, autobus zerbitzuan aldaketak izango dira.
Zumaia - Donostia
Zumaiatik 16:30ean, 17:30ean, 18:30ean (UK09), 16:55ean, 17:55ean (UK10) eta 17:15ean (UK11) abiatzen diren zerbitzuak Patxita Etxezarretako geralekutik irtengo dira, eta Meaga gainetik jarraituko dute Zarautzerantz. Autobusek ez dituzte ohiko geralekuak egingo Zarautzen. Horrela, Bizkaia Kaleak Argiko geralekua ordezkatuko du, kiroldegiaren biribilguneak Sanz Eneako geralekua eta suhiltzaileen biribilguneak San Pelaioko geralekua.
Donostia - Zumaia
Donostiatik 16:00etan, 17:00etan, 18:00etan (UK09), 16:55ean, 17:55ean (UK10) eta 16:00etan (UK11), abiatzen diren zerbitzuak, Zarauzko geralekuetan gelditu ondoren, Meaga gainetik jarraituko dute Zumaiarantz. Kasu honetan ere, goian aipatutako geralekuak egingo dituzte autobusek Zarautzen.
Zerbitzu bereziak Getaria eta Zarautz artean
Getaria eta Zarautz artean zerbitzu bereziak ipiniko ditu Lurraldebusek. Hau izango da ordutegia:
- Getaria - Zarautz: 16:20, 16:45, 17:05, 17:20, 17:45 eta 18:20.
- Zarautz - Getaria: 16:35, 16:55, 17:30, 17:55, 18:30 eta 18:55.
Zarautzen errepide mozketak
Arratsaldeko 15:30etik 19:30ra, Zarauzko Nafarroa kalea (N-634) trafikorako moztuta egongo da bi noranzkoetan. Hori dela eta, barrualdetik zirkulatu beharko da (Iritako biribilgunea-Zubiaurre Zahar-Maria Etxetxiki-Araba-Urdaneta-Bizkaia-San Inazio).