Olagarroarekin prestatzeko lau errezeta berri proposatu dituzte sukaldaritza erakustaldian

Errezeta tradizionalez gain, olagarroa prestatzeko hamaika modu badela erakutsi dute Torreberriko aterpean egindako sukaldaritza erakustaldian. Herritar ugari gerturatu da, errezetak zuzenean sukaldatzen ikusi eta dastatzera. 

Olagarroa oinarri hartuta, lau errezeta berriren proposamena egin dute sukaldaritza erakustaldian. Hona hemen errezetak:

OLAGARROA BAKAILAO BRANDADAREKIN, CABRALES GAZTAREKIN ETA PIL-PILAREKIN

Osagaiak (4 lagun):

  • 1 tipula, 1 baratxuri ale
  • 2 patata
  • 100 g Cabrales gazta
  • 2 koilarakada esnegain likido (behar izanez gero)
  • 2 bakailao trontzo
  • 100 g ekilore olio
  • 4 olagarro erro egosita
  • 2 koilarakada oliba olio

Nola egin:

 CABRALES GAZTADUN PARMENTIERRA

1.- Patatak egosi, horretarako ur hotza ardo zuriarekin, erramuarekin eta gatzarekin usaingozatuta. Egosi eta gero, gorde.

2.- Tipula txikitu Juliana erara eta y sueztitu su txikian oliba oliotan, kolore iluna hartu arte. Prest dagoenean, gazta erantsi eta eragin tipularekin bat egin arte.

3.- Patata egosia puregailuan pasatu, Cabrales gaztadun tipula gehitu eta gatza nahikoa duen begiratu.

BAKAILAOA PIL-PILEAN

1.- Oliba oliotan gorritu baratxuri txikitua, atera baratxuria eta olioa gorde.

2.- Erretilu batean jarri bakailao trontzoak eta gainean jarri baratxuriak gorritzeko olioa. Labera sartu eta konfitatu 80o ºC-ra 20-30 minutuan.

3.- Konfitatutako bakailaoa atera eta gorde; bestetik, pil-pila egingo dugu konfitatutako bakailaoaren olioarekin irabiagailu elektrikoan (hobeto loditzeko baratxuri bat gehitu daiteke).

BRANDADA EGITEKO: Cabrales gaztadun parmentierra nahastu bakailao puskekin eta behar duen gatza bota.

MUNTATZEKO: Plater batean jarri brandada zati on bat malko itxura emanda, haren gainean olagarro erro egosia (edo nahi izanez gero plantxan pasatuta) eta gainean bota bakailaoaren pil-pila.

OLAGARRO ETA BARAZKI BROTXETA TINTA ETA LIMA TENPURAREKIN

Osagaiak (4 lagun):

- Kuiatxo (kalabazin) erdia

- Alberjinia (berenjena) erdia

- 1 tipula more

- 4 olagarro erro egosita

- 100 g tenpura irina

- 2 tinta zorro

- 1 lima

- Ekilore olioa frijitzeko

Nola egin:

1.- Olagarro erroak xerratu eta brotxetetan jarri, barazkiekin tartekatuta, txandaka; saiatu antzeko tamainakoak izan daitezen denak.

2.- TINTA ETA LIMA TENPURA EGITEKO: tenpura irina ur oso hotzean desegin behar da, fin-fina eta pikorrik gabe geratzen dela zainduta, likidoegia izan gabe. Tinta zorroak eta lima birrindura gehitu. Testura emateko (finagoa ala lodiagoa) izotza erabiliko dugu.

3.- Olio berotu gutxi gorabehera 180 graduan; brotxetak pasatu tenpuran, gehiegizko irina kendu eta kapa fin-fin bat bakarrik utzita. Frijitu tenpura belztu eta barazkiak egin arte, baina ez 45 segundo baino gehiago; aldea dago frijigailuan edo kazoan egin.

4.- Frijitutakoan, gehiegizko olioa kentzeko, jarri sukalde sareta baten edo paper xurgagarri baten gainean. Oso bero daudela zerbitzatu.

OLAGARRO TRIPAKIAK PERRETXIKOEKIN ETA ALGEKIN

Osagaiak (4 lagun):

- 4 olagarro buru egosita

- 1 txerri hanka

- 50 g kardu ziza

- 50 g lanperna alga (codium)

- 1 tipula more, bi baratxuri ale

- 3 koilarakada oliba olio

- Baso erdia txakolin

- Txorizo erdia (aukeran)

- Koilarakada bat piperrauts

- Koilarakada bat piper txorizero

Nola egin:

1.- Txikitu tipula eta baratxurik fin-fin eta olioarekin sueztitu.

2.- Txerri hanka egosi olagarroa egosteko saldarekin. Ez badaukazu, uretara erramu hosto bat bota eta egosi.

3.- Ondo garbitu olagarro buruak eta txikitu gutxi gorabehera cm koadroko pusketan. Berdin egin hankarekin eta perretxikoekin.

4.- Tipula eta baratxuri frijituen gainean jarri ordena honetan honako hauek: perretxikoak (minutu erdian sueztitu), piperrautsa (mina izan daiteke, aukeran), piperra eta txakolina. Urritzen utzi eta gehitu txerri hanka egosteko ura; orduantxe erantsiko dizkiogu txorizo osoa eta olagarro buruen puskak.

5.- Egosi ohiko tripakien testura hartu arte eta, amaitzeko, erantsi txorizo pikatua eta algak fin-fin txikituta.

ARROZ BELTZA OLAGARROAREKIN

Osagaiak (4 lagun):

  • 500 g arroz
  • 1 kg olagarro
  • ½ tipula
  • ½ piper berde
  • 3 baratxuri ale
  • ½ alberjinia (berenjena)
  • ½ baso jerez
  • 1,5 l olagarro salda (egosteko erabilitakoa)
  • 100 g oliba olio
  • 1 koilarakada piperrauts
  • 4 tinta zorro
  • Barazkiak gozagarri (aukeran)

Nola egin:

1.- Ohi bezala egosi olagarroa, arroza egiteko erabiliko dugun salda kantitateari egokituta (1,5 litro).

2.- Laukitxoetan txikitu barazkiak, olioarekin sueztitu, arroza erantsi, sueztitu, piperrautsa bota, sueztitu eta pixkanaka bota jereza, agortu arte.

3.- Orduan, tinta zorroekin nahastutako olagarro salda botako diogu, nahi baduzue barazki batzuekin usaingozatuta: tipula, porruen zati berdea, apioa, perrexila, erramua...

4.- Su bizian egosi lehen 5 minutuetan, pixkanaka sua jaitsi eta ahal izanez gero arrozik ez ukitu egosteko hasierako prozesu honetan. Horrela, tarte horretan arrozak almidoia askatzea eragotziko dugu eta errazago lortuko dugu aleak behar duen puntua hartzea.

5.- Arroza puntu-puntuan edo “al dente” dagoenean, sua itzali eta utzi taparik gabe beste 5 minutuan, arroza ukitu gabe. Zerbitzatu aurretik, orduantxe eragin.