Martxoak 8

Martxoaren 8an goizean goizetik kaleak hartzeko deia egin du mugimendu feministak

Emakumeen Nazioarteko Egunaren harira, egun osorako egitaraua antolatu du Zumaiako Mugimendu Feministak. Lantokiak, heziguneak eta etxeak hustu, eta kaleak hartzeko deia egin dute. 

Goizeko 9:00etarako Beheko Plazan elkartzeko deia egin dute. Gosaldu ondoren, martxa zaratatsua egingo dute herriko kaleetan zehar. Oinez, bizikletan nahiz patinetan joateko dei egin dute. 10:30ean, aldiz, greba feministaren inguruan hausnartuko dute, Alondegian. Jarraian, 12:00etan, Zubitxikitik hasita, mobilizazio zaratatsua izango da.

Beheko Plazara itzuliko dira ondoren. Emakumeen* bazkari autogestionatua egingo dute bertan, eta bazkalostean, 16:00etan hasita, askotariko ekintzak egingo dituzte; besteak beste, mugimendu eta dantza, batukada, kartel eta txalaparta tailerrak. 

Saregileen plazaitik abiatuta, manifestazioa antolatu dute arratsaldeko 19:00etarako. Beheko Plazan amaituko da protesta, eta ekitaldi bat ere prestatu dute mugimendu feministako kideek. 

Gosaria, ogia, edaria, kafe zein infusioak grebako koordinazio lan-taldeak eramango ditu. Bazkaria eta iluntzeko luntxa, ordea, autogestionatuak izango dira, beraz, norberak etxetik eraman eta elkarbanatzeko deia egin dute. Bestetik, zarata egiteko tresneria eramateko ere eskatu dute.