Gaur, Boluntariotzaren Nazioarteko Eguna da, eta Gipuzkoako Foru Aldundiko Ingurumeneko Departamentuak eta Surfrider Foundation Europe ordezkaritza espainiarrak 60 boluntarioren lana aitortu dute Donostiako Aquariumean egin den ekitaldian.
Urtero Surfrider Espainiak Euskadiko hiru hondartzetan egiten duen itsas-zaborra monitorizatzeko ekimenean parte hartzen dute ekitaldi honetako pertsonek. Itsas-zaborraren arazoa aztertzeko garrantzitsua da monitorizazioa; izan ere, itsasora 10.000.000 milioi tona hondakin iristen dira urtero.
Ekitaldian izan dira Zumaiena Ikastetxeko ikasleak Inpernupe hondartzan egindako segimenduagatik. Horiez gain, Nagusilan taldekoak eta BHI Mutrikukoak ere izan dira; horiek Mutrikuko Burumendi hondartzan egindako itsas-zaborren kontrolean parte hartu dute. Bestetik, Euskal Kostaldeko Geoparkean egindako elkarlanetik Gonzalo Torre izan da, Geoparkeko Ingurumeneko arduraduna.
Amaitzeko, Jose Ignacio Asensio, Aldundiko Ingurumeneko diputatuak, hau esan du: “Ezin dugu ahaztu gure hondartzetan eta itsasoetan hondakinen eta plastikoen arazoa Gipuzkoak aurre egin beharreko ingurumen arazorik larrienetako bat dela”.