Orain arte etxean jokatutako partida guztiak irabazi dituzte irundarrek, baina Artalekutik kanpo garaipenik lortu gabe zegoen Bidasoa. Atzo Ander Torrikoren talde ohiaren aurka zuten partida, Benidormen aurka alegia. Bi goleko aldearekin irabazi zuen, 21-23, eta garaipen horretan garrantzia izan zuen Kauldi Odriozolak lortutako lau golek. Lesioaren ondoren indartsu bueltatu da zumaiarra.
Bidasoa bigarren da sailkapenean, 11 punturekin, Granollers eta Ademar Leon indartsuekin berdinduta.
Ander Torrikori dagokionez, bere taldea, Blendio Sinfin kantabriarra, 11. da sailkapenean, 7 punturekin. Santanderkoek Frigorificos Morrazo taldea hartu zuten atzo La Albericia kiroldegian, eta 25-21 emaitzarekin irabazi zieten galiziarrei. Berebiziko balioa izan zuten Torrikok lortutako sei golek.