Haur eta gazteen heziketarekin lotutako gaiak landuko dira: haur eta nerabeen autoestimua nola zaindu, familiarekiko komunikazioa eta elkarbizitza nola hobetu, neba-arreben edo lagunarteko erlazioak nola kudeatu… Horrez gain, aurten arreta berezia eskainiko zaio bullying eta ziberbullyingaren gaiari.
Saioak urtarrilaren 29an hasiko dira, martxoaren 12ra arte; astelehenero egingo dira, otsaileko lehen astean izan ezik: astelehenean (5ean) egin ordez, asteazkenean (7an) egingo da. Saio guztiak Brankako bilera gelan izango dira (atzeko atetik sartuta), 6-12 urte bitarteko gurasoentzat 15:00etatik 16:30era, eta 13-18 urteko gazteen gurasoentzat, berriz, 19:00etatik 20:30era.
Izar Arregi psikologoak eta Joxe Amiama pedagogoak gidatuko dituzte bi eskolak eta, goian aipatutako gaiak landuko diren arren, gurasoek eskolan planteatzen dituzten kezka eta gaiei erantzuten ere saiatuko dira.
6-12 urte arteko haurren guraso eskolan parte hartu nahi dutenek ikastetxean eman behar dute izena eta 13-18 urteko gazteen gurasoek, aldiz, Brankan.
Informazio gehiago jasotzeko 943 86 22 00 edo 943 86 50 25 (luzapena 110) telefonoetara deitu dezakete interesdunek.