Urtero hartzen duen azokarako hilabete eskas falta dela, Durangoko Landako gunea kultur topaleku izan da gaur ere. Bertsolari Txapelketa Nagusiko finalaurreko saioa gauzatu da gaur han eta 2.100 ikus-entzule hurbildu dira Miren Artetxe, Miren Amuriza, Aitor Mendiluze, Iñaki Apalategi, Jon Maia eta Oihana Iguaran bertsolariak entzutera.
Aitor Mendiluzek batu ditu puntu gehien gaurko saioan, 740,5 guztira. Gainerako parte-hartzaileei dagokienez, 678,5 eskuratu ditu Miren Amurizak; 675 Jon Maiak; 671 Oihana Iguaranek; 648 Iñaki Apalategik; eta 639 Miren Artetxek.
Bigarren itzuliko saioak, zehaztuta
Finalaurrekoetako lehen lau saioak eginda, 24 bertsolarietatik 18k egingo dute aurrera bigarren itzulian. Zuzenean sailkatu diren saioetako irabazleekin batera, puntuazio altuena lortu duten bertsolariak sailkatu dira txapelketan aurrera egiteko. Hauxe da zerrenda:
- Maialen Lujanbio (Irungo irabazlea)
- Sustrai Colina (Bastidako irabazlea)
- Beñat Gaztelumendi (Maule-Lextarreko irabazlea)
- Aitor Mendiluze (Durangoko irabazlea)
- Aitor Sarriegi
- Igor Elortza
- Agin Laburu
- Miren Amuriza
- Jon Maia
- Jon Martin
- Oihana Iguaran
- Jone Uria
- Julio Soto
- Unai Agirre
- Nerea Ibarzabal
- Etxahun Lekue
- Alaia Martin
- Iñaki Apalategi
Amurrion, Donibane Lohizunen eta Iruñean izango dira finalaurrekoak datozen hiru asteburuetan: azaroaren 19an, 26an eta abenduaren 2an, hain zuzen. Jon Maiak Beñat Gaztelumendi, Sustrai Colina, Etxahun Lekue, Jon Martin Etxebeste eta Nerea Ibarzabal izango ditu Amurrioko saioan aurkari.