Hitzarmen horren berri eman du gaur Gipuzkoako Aldizkari Ofizialak. Bertan jasotzen den bezala, Santiago hondartzako eremua bi udalerrien artean banatuta dago, "nahiz eta muga zehatza non izan behar den bi udalerrien artean inoiz ez den erabat finkatu. Desadostasun hau historikoa gertatzen da eta bi Udalerriek Aldundiari gaia behin betiko finkatzea eskatu diote".
"Santiagoko hondartza Getariako herrigunetik urruti dago eta aldiz Zumaiako herrigunearen ondoan, hain zuzen Urola ibaiaren itsas-adarrak banatzen du herrigunetik. Errealitate geografiko honengatik, Zumaiako Udalarentzat garrantzi handikoa gertatzen da eta aldiz Getariako Udalarentzat ez", dio hitzarmenaren sarreran.
Orain, Santiagoko hondartzaren Ingurumen Berreskurapenaren proiektua dela eta, hitzarmen bat onartzea erabaki dute bi herrietako plenoek. Hitzarmenak 50 urteko iraupena izango du eta honako puntuak jasotzen ditu:
- 1. Zumaia eta Getariako U.E-an, (Gipuzkoa), Santiagoko hondartzaren Ingurumen Berreskurapenaren proiektua-tik eratorritako azpiegituren emakida Zumaiako Udalak hartuko du bere gain. Getariako Udalak, berriz, bere eskumenei uko egin gabe, emakidari renuntzia egiten dio 5. Klausulan adierazitako iraupenarekin.
- 2. Aipatu azpiegituren mantenurako ohiko inbertsioak eta aparteko gastuak Zumaiako Udalak finantzatuko ditu.
- 3. Saneamendu obrak Zumaiako Udalak exekutatu eta finantzatuko ditu.
- 4. Sorospen zerbitzua Zumaiako Udalak hartuko du bere gain, beharrezko kontratazioak eta kalitatezko zerbitzua emateko beharrezko neurriak hartuz.
- 5. Zaborra zerbitzua: Zumaiako Udalak zerbitzu honen gastuaren kargu egingo da.
- 6. Komun publikoak: bere artapena, esplotazioa eta ardura Zumaiako Udalaren ardurapean geratutako da.
- 7. Mugaketa espedientearen tramitazioa burutzen denean, dagokion Udalaren ardurapean geratuko da Pintura Etxe izenarekin ezagutzen den higiezinaren berrikuntzarako obra baimenaren izapidaketa eta onarpena, hala balegokio.
Getariako eta Zumaiako mugarteak salbu daude hitzarmen honetan adostutakoarekin. Bestalde, jarraipen, zaintza eta kontrolerako batzordea osatuko da Getariako eta Zumaiako Udaleko ordezkariekin hitzarmenaren aplikazio zuzena bermatze aldera.