Zarauztarra bat, azkoitiarra bestea, biak ere Zumaian bizi dira. Biek ere argazkigintzako ikasketak egin zituzten eta hasiera batean sare sozialetara igotzen hasi ziren beraien lanak. "Oso erantzun ona jaso genuen eta hala animatu ginen erakusketa hau muntatzera", diote.
Zumaian ateratako lanak erakusten dituzte mostra honetan. Itzurun inguruan bai, baina baita beste leku batzuetan ere, paduran, adibidez. Denak ere eguzkia desagertzera doan une horretan ateratakoak dira. "Zumaia argazkilariontzako zoragarria da eta badaude toki batzuk txundigarriak direnak".
Naturarekin lotutako argazkiak ateratzeaz gain, argazki erreportajeak ere egiten dituztela azaltzen dute eta beraien lanak erakustera emateko asmoarekin www.argiart.com izeneko ataria martxan jartzekotan dira. Bitartean, erakusketan dauden lanak erosteko aukera dago.