Portugalgo hiru probekin eta Kanariar Uharteetako azken probarekin osatuko da aurtengo txapelketa. Alex Uranga sailkapen nagusiko laugarren postuan dago (Jeff Hubbard, Costes eta Lavernheren atzetik), eta dena emateko gogotsu dago urtea ahalik eta posturik onenean amaitzeko. Abuztuan olatu politak izan dira euskal kostaldean eta uretan ondo entrenatzeko aukera izan du Alexek.
Sintrako txapelketan zozkatu dituzte kanporaketak, eta Alex hirugarren errondan sartuko da uretara. Lewy Finnegan australiarra eta aurreko kanporaketatik sailkatutako beste bi rider izango ditu aurkari.
Hiru izarreko proba da Sintrakoa, Vianakoa bezalaxe. Nazarekoak baina, lau izar dauzka, eta horixe du begiz jota Alexek, oso gustuko baitu Nazareko olatu ikusgarria.