Geltokitik zentrora arteko bidea Irungo Harrera Sareko kide batekin egin zuten. Solasean, gerora ere sarri entzun dudan galdera bera bota zuen: «Zergatik batzuei bai eta besteei ez?». Erakundeen erantzunaz, laguntzeko gogoez, ari zen.
Galdera hark are oihartzun handiagoa izango zuen biharamunean. Ibrahima, besteetako bat, Bidasoa ibaia gurutzatu nahian desagertu zen. Haren gorpua ez zuten hiru aste igaro arte aurkituko. Ez da Ibrahima modu horretan bizia galdutako lehena. Urrunago joan gabe, azaroan Santiago zubian izan zen kazetari hau. Sohaiboren agurrean. Orduan ere eskaera bat: neurriak, “Bidasoa izenik gabekoen ibaia izan ez dadin”.