BEOBIDE IRUDIGILLEARI ZUMAIAK BERE ESKER ONA
Jaunak emana dezu, Julio,
irudigille-sormena;
ta zuk ordaiñez Jaunaren alde
jarri zendun eder-sena.
Dena da sakon zure bidean,
dena bikain, dena bena;
Gurutzegintzan, ala ere zuk,
jaso dezu zure izena.
Zure biotza ixuri dezu
Gurutzearen lanketan;
Jaunari artu zenion bere
Arnasa azken-oiñazetan;
Saietsa odol, Biotza-agiri,
iltzeak esku-oiñetan…
Ai, zer nolako saria dizun
Jaunak prest zeru-goietan!
Txirrindulari yayoa ikusi
zaitugu bidetan barna,
aldapetako aukerakoa
zure anka melar bana,
aizea ere ebakitzeko
nolako sudur labana!
Aragiz urri, ezurra pranko,
orra Beobide jauna!...
Itxas-ertzean, moilla-bidean
egiña dezu etxea;
amaika ordu joan zaizkitzu
landuaz eder-gosea;
panparroikeri aundirik gabe
buruturik lan betea.
Argatik esker onez jo dizu
Zumaiak gorasarrea
Etxaniz’tar Nemesio