Larunbatean Tantaz Tanta ekimenak euskal presoen eskubideen aldeko itsaso erraldoia osatu nahi du Bilbon. Zumaiako Ezker Abertzaleak parte hartzera deitu nahi ditu zumaiarrak, are gehiago atzoko atxiloketen ondoren. Zumaiako Sortuk, Ernaik eta LABek prentsa ohar bidez zabaldu dute atzoko atxiloketen inguruko hausnarketa.Horrela dio:
Beste behin ere Estatu Espainolak bere benetako aurpegia erakutsi du gaurkoan [atzokoaz], Guardia Zibilak hortzetaraino armaturik euskal herritarrak atxilotzera bidali dituenean. Aurpegi hau ez zaigu ezezaguna, eta jarrera honek ez gaitu, inondik inora, harritu.
Gaurko operazio mediatiko-poliziala duela egun batzuk Euskal Preso Politikoen Kolektiboak egindako adierazpen ausartari eta handik gutxira preso ohiek beroni eman zioten erabateko atxikimenduari erantzutera dator. Ezin argiago, Estatu Espainolak ezker abertzaleak konponbideari begira emandako urrats bakoitzari bortxaz eta ukazioz erantzuten dio. Eta honela egingo du etorkizunean ere.
Halere, inork uste badu bidea oztopo errepresiboz beteta egonagatik Ezker Abertzaleak urratsak emateari uko egingo diola, oso oker dabil. Ezker Abertzaleak ez ditu urratsak Madril edo Parisi begira eman, ezta emango ere. Ez dugu eurengandik inolako maila demokratikorik espero. Ezker Abertzaleak urratsak euskal herritarrei zein nazioarteari begira eman ditu, eta horrela ematen jarraituko dugu. Horrela, Estatu Espainolak gaurkoa bezalako jokabideekin jarraituta gero eta sinesgarritasun gutxiago du bai euskal herritarrengan, baita nazioartean ere.
Euskal Herriak konponbidea eta justizian oinarritutako bake eszenatoki bat ezagutuko baditu, hori euskal herritarron eskutik helduko da. Arestian aipatu bezala herri honek Madril eta Parisera begiratzeari utzi eta askapenera bidean urratsak herri moduan eman behar ditu. Herritarron mobilizazio eta presioak ekarriko ditu etorkizuneko aldaketak. Euskal Herritarrok baitugu hitza eta erabakia.
Horrekin guztiarekin lotuta, garbi dugu gaurko operazioak EPPKren erabakiari erantzutea helburu badu, zein den herri moduan eman dezakegun erantzunik irmoena. Mobilizazioa eta herri presioa indartzea guztion ardura da, denon ekarpena izango da garrantzitsua. Bide horretan, lehen zita larunbat honetan dugu, Bilboko kaleak bete behar ditugu munduari herri honek aurrera egin nahi duela erakusteko. Aurrera egiteko sakabanaketa moduko mendeku politikak indargabetuko dituen itsasoa osatu behar dugu. Beraz, Ezker Abertzaleak zumaiarrei larunbatean Bilbora joateko dei egiten die, bakearen etsaiei eman diezaiokegun erantzunik onena hori bera delako.
ZUMAIAKO SORTU, ERNAI eta LAB