Zumaiar askok eztanda entzun du gaur arratsaldean 18:00ak pasatxoan. Izan ere, Ertzaintzak bi obus leherrarazi ditu Zumaiena inguruan.
Ertzaintzak hedabide honi jakinarazi dionez, herritar baten deia jaso dute 16:30ean aurkikuntzaren berri ematen. Ertzainak bertaratu dira, eta bi proiektil aurkitu dituzte. Protokoloa jarraitu, eta leherketa "inolako arazorik gabe" burutu dela azaldu dute. Hori bai, aurrez, hustu egin dute Zumaiena ikastetxea.
Itxura guztien arabera, 1936ko gerrako materiala zen lehertutakoa, baina Ertzaintzako prentsa bulegokoek ezin izan dute baieztatu datu hori.