Gipuzkoako Foru Aldundiko Kirol Departamentuak 28.000 euro eman dizkio Zumaiako Udalari itsas kiroldegia berritzeko lanak finantzatzen laguntzeko. Isolamendu termikoa hobetzea helburu duten lanak abiatu ditu udalak bertan, eta 62.000 euroko aurrekontua dute. Jasotako dirulaguntzak, beraz, gastu horri aurre egiten lagunduko dio.
Aldundiak hainbat laguntza ildo ahalbidetu ditu azken urteetan lurraldeko kirol instalazioak hobetzeko, eta, aurten, ohiko kirol-ekipamenduak ordezkatzea, lekualdatzea, birmoldatzea, handitzea eta birgaitzea erraztu nahi izan ditu. Hala, 256.000 euro bideratu ditu orotara Urola Kostara. Izan ere, Zumaiak jasotako dirulaguntzaz gain, Azkoitiak, Getariak eta Zarautzek ere jaso dituzte funtsak. Harkaitz Millan Kiroletako diputatuaren hitzetan, "jarduera fisikoa egiteko hurbileko espazioak edukitzea biztanleriaren jarduera mailetan eragina du". Horregatik, espazio aproposenak eskaini nahi dizkietela azald du diputatuak.