Juan Martinez de Mendaro kapitainak enkargatutako taula da Zumaiako San Pedro parrokiak gordetzen duen artelanetako bat. Zaharberritze lan luzearen ondoren, pasa den Aste Santuan itzuli zuten bere lekura, parrokiko albo batean dagoen kaperara.
Garrantzitsua bezain ezezaguna askorentzako, taula flandriar honen xehetasunak ezagutzeko aukera izan dute gaur zenbait herritarrek bi bisita gidatuei esker. Ismael Manterola EHUko Artearen Historiako irakasleak eman ditu azalpenak. Koadroa baino gehiago, "objektu sakratua" dela nabarmendu du Manterolak. Artelan honen jatorriaz, egiteko erabilitako materialez eta bertan kontatzen denaz ere hitz egin du adituak.
