Gipuzkoako Foru Aldundiak eta lurraldeko hainbat udaletako alkateek eta zinegotziek indarkeria matxistarik gabeko jaiak aldarrikatu dituzte gaur goizean Donostian egin duten agerraldian. Indarkeria matxistaren aurrean “zero tolerantzia” dutela adierazi dute erakundeetako ordezkariek, eta datozen hilabeteetan herrietan eta auzoetan egingo diren jaiak emakumeen aurkako indarkeria matxistarik gabeko gune izan daitezen konpromisoa agertu dute.
Markel Olano Ahaldun Nagusiarekin batera izan dira agerraldian hainbat zinegotzi eta alkate, tartean Xabier Txurruka Zarauzko alkatea, Mertxe Zubillaga Azkoitiko zinegotzia, Ane Loidi Getariako zinegotzia, Beatriz Zubia Zestoako zinegotzia eta Maider Alberdi Zumaiako zinegotzia, baita hainbat teknikari ere. Gipuzkoako erakundeek Berdintasunerako Foru Organoak sustatutako lan prozesu baten emaitza den adierazpena kaleratu dute; izan ere, azken hilabeteetan lan jardunaldi batzuk egin dituzte politikari eta teknikari hainbatek. Besteak beste, jaietako sexu indarkeriaren ezaugarriei buruzko gogoeta gauzatu dute horiek, eta sexu erasoei aurre egiteko prebentzio, arreta eta erantzun publikodun politikak landu dituzte.
Adierazpena Markel Olano diputatu nagusiak, Maider Lainez Andoaingo alkateak, Aizpea Goenaga Errenteriako alkateak eta Ane Beitia Elgoibarko alkateak irakurri dute, eta indarkeria matxistarik gabeko jaiak aldarrikatu dituzte. Haiek adierazi dutenez, jaietan gertatzen diren “urratze ludikoak” ezin dira festetan emakumeen aurkako indarkeria matxista legitimatzeko edo normalizatzeko aitzakia izan. “Jaietako aisia eta gozamena emakumeen eskubidea da, eta eskubide hori berdintasunean gauzatzeko aukera izan behar dute”.
Emakumeen aurkako sexu erasoak jaien testuingurutik kanpo uzteko lan egiteko konpromisoa agertu dute, eraso horiek “egiturazko indarkeria testuinguruan puntualki gauzatzen den indarkeria matxista” direla zehaztuta. “Eraso horiek ez ditu festa giroak eragiten; giro hori hartzen da erasoa egiteko aitzakiatzat”. Halaber, udalek eta aldundiak jaien antolaketan, sentsibilizazioan eta prebentzioan, biktimentzako arretari lotutako eta erasoen aurkako erantzun publikoa emateko “politika argiak” ezartzeko konpromisoa hartu dute: “Jaiak emakumeen aurkako indarkeria matxistarik gabe gozatzeko gune bihurtzeko ahal den guztia egiteko konpromiso partekatua berresten dugu. Gizarte osoari dei egiten diogu sexu indarkeria matxistaren existentziaz jabetu dadin, eta pertsona bakoitzak, bere erantzukizunaren esparruan, konpromiso aktiboa har dezan indarkeria matxistarik gabeko jaien alde”.
Honako lotura honetan irakur daiteke Aldundiak eta udalek kaleratu duten adierazpen bateratua.