Partaidetzazko aurrekontuak osatzeko proposamenak egin zituzten zumaiarrek martxoan, 281 guztira. Arrazoi desberdinengatik –udal eskumenekoak ez direlako, aurrekontua gainditzen dutelako...– batzuk zerrendatik baztertu ondoren, 156 proposameneko zerrenda aztertuko dute orain.
Asmoa da horietatik 60 hautatzea. Zerrenda hori osatzeko hirugarren saioa izango da bihar, asteazkena. Udaletxeko pleno aretoan elkartuko dira, 18:00etan. Honako gaiei lotutako proposamenak aztertuko dituzte:
- Euskara
- Hezkuntza eta heziketa
- Hirugarren adina
- Irisgarritasuna: hilerria, igogailua, mugikortasuna
- Kultura: azpiegiturak, jaiak, liburutegia, ondarea
- Mugikortasuna: aparkalekua, bide segurtasuna, bidegorria, oinezko bideak
- Tokiko garapena: enplegua, irisgarritasuna, merkataritza, ondarea-turismoa
Saio hauetan aukeratutako proiektuak bozketa fasera pasako dira gero, udalaren esanetan. Gero, udal teknikariek aztertu eta baloratuko dituzte hirugarren fasera pasatutako proiektuak, eta irailean herritarrek bozkatuko dituzte aurrekontuetan txertatuko diren proposamenak.