Beste behin, San Telmo egunez esku pilota jaialdi dotoreaz gozatzeko aukera izango dute pilotazaleek Aitzuri frontoian. Astelehenean 17:30ean hasita, hiru partidaz gozatu ahalko da.
Partida nagusia banakako txapelketako final laurdenekoa izango da, Artola eta Laso aurrez aurre jarriko dituena. Bestetik, promozioko partida ere jokatuko da, hori ere final laurdenetakoa; hor Alberdi eta Salaberria lehiatuko dira.
Azkenik, Victor-Martija eta P. Etxeberria-Bikuña pilotan ikusteko aukera ere izango dute Aitzurira bertaratzen direnek.
Sarrerak salgai daude
Sarrerak aurrez eros daitezke Internetez, 25 eurotik hasita. Egunean bertan, berriz, 16:30ean zabalduko dute pilotalekuko leihatila.