Zumaia aitzindari ari da izaten Euskal Herrian burujabetza teknologikoaren esparruan. Azken hilabeteotan proiektu ugari sortu da herri mailan, eta ekimen horiek herritarrei gerturatzeko asmoz, gaiaren inguruko jardunaldiak antolatu ditu Baleike Kultur Elkarteak, Zumaiako Udalaren laguntzarekin.
Herritarrei zuzendutako ekimen dibulgatiboa izango da, eta herriko adituek burujabetza teknologikoak duen garrantzia nabarmendu eta Zumaian sortzen ari diren aukerak testuinguru horretan kokatuko dituzte. Hizketaldi labur bana eskainiko dute Josu Fernandez de Arroiabek, Olatz Arregik, Igor Unanuek eta Josu Waliñok.
Iñaki Ostolaza Zumaiako alkateak egingo du jardunaldiak hasteko hitzartzea, eta gero hartuko dute hitza adituek. Olatz Arregi EHUko Informatika fakultateko irakasleak eta IXA taldeko kideak adimen artifizialaren esparruan euskarak dituen erronkak izango ditu mintzagai. Eguneroko bizimoduan gero eta garrantzia handiagoa hartu dute hizkuntza darabilten aplikazioek eta tresnek. Halako aplikazioetan euskara ingelesaren edo gaztelanian pare jartzeko egin daitekeenaz arituko da Arregi, besteak beste.
CTO eta S21sec-en sortzaileetako bat da Igor Unanue. Datuen pribatutasuna eta segurtasuna izango ditu hizketagai: erasoek gora egin dute azken aldian, eta Interneten erabilpenean neurriak hartzea beharrezkoa da, Unanueren arabera. Pribatutasunaren garrantziaz arituko da.
Zubiri-Manteo Ikastetxeko IKT ikasgaieko irakaslea da Josu Fernandez de Arroiabe. Burujabetza teknologikoak hezkuntzan duen garrantzia nabarmenduko du, gaur egungo haurrak eta gazteak gizarte digitalizatu batean bizi diren heinean.
Josu Waliño PuntuEus Fundazioko zuzendaria txikitasunetik enpresa handien jardunean eragiteko dagoen gaitasunaz arituko da. Burujabetza teknologikoa norbanakoen eta komunitate txikien askatasuna sarean zaintzeko eta bideratzeko beharrezkoa dela kontuan izanik, zumaiarrak bide horretan aitzindari direla azalduko du. Aurreko hiru hizlariak azaldutakoaren ondoren, Waliñok itxiko du hizketaldia, aurrekoek esandakoa Zumaian dauden ekimenekin elkartu nahian.
‘baleike.eus’-en ere bai
Ekitaldia gaur izango da, 19:00etan, Alondegiko Oxford aretoan. Bertaratu ezin dutenek, jardunaldiak zuzenean jarraitzeko aukera ere izango dute streaming bidez, baleike.eus atarian. Bideoaren grabazioa ere argitaratuko da ondoren.