Euskal preso, iheslari eta deportatuen etxeratze prozesuan bultzada ematea helburu hartuta, eskualde mailako ekitaldiak egingo dituzte larunbat eta igande honetan Sare eta Etxerat euskal presoen aldeko mugimenduek.
Batetik, kostako herriak lotuko dituzte larunbat goizean Ibilian-ibilian, etxerako bidean lelo hartuta, eta Getarian elkartuko dira Zumaia aldetik nahiz Orio aldetik joandako herritarrak.
Zumaian 10:00etan elkartuko dira herritarrak Beheko Plazan, eta oinez egingo dute Getariara arteko bidea.
Oriotarrak 09:00etan elkartuko dira plazan, eta Txurrukatik barrena iritsiko dira Zarauzko malekoira. Borgetto parean elkartuko dira bi herrietako ibiltariak 09:45ean, eta oinez egingo dute ondoko herrirako bidea.
Ekitaldi nagusia Getarian izango da, Bista Onan, 11:30ean.
Oinez ez ezik, itsasoz iritsiko denik ere izango da, Oriotik traineru bat aterako delako 09:30ean portutik.
Azkenik, zestoarrek jakinarazi dute 09:15ean Gurutzean elkartuko direla, kotxeetan joateko kostako ekitaldira.
Hondartzetan, igandean
Hurrengo egunean, igandean, urteroko hondartzetako hitzordua izango dute zain herritarrek. Etxeratek Euskal Herriko hainbat hondartzatan egingo du euskal preso, iheslari eta deportatuen eskubideen aldeko aldarria, eta eskualdeari dagokionez, Orioko eta Zarauzko hondartzetara gerturatu beharko dute helburuarekin bat egiten duten herritarrek.
12:00etan egingo dute bilkura bi hondartza horietan.
Igandeko ekitaldi horrekin amaituko da azken asteetarako bi mugimenduek prestatu dituzten ekintzak.