Kabra eta dontzeilen eta Arrain txikien arrantza lehiaketak antolatu izan ditu Anade elkarteak azken hamarkadatan. Lehena, kabra eta dontzeilena, ostegunetan jokatzen zen; arrain txikiena, berriz, asteburuan. Aurten bi lehiaketak egun bakarrean egingo dituzte; igandean, abuztuaren 1ean, hain zuzen ere. Horrez gain, sari banaketa ekitaldia Kofradiako estalapean egingo dute, eta ez egoitzen. Neurri honekin COVID-19agatik sor daitezkeen arriskuak ekidin nahi ditu Zumaiako elkarte honek.
Kabra eta dontzeilen lehiaketak 45. edizioa beteko du aurten. Esan bezala, lehiaketa abuztuaren 1ean egingo da. Ontziak Zumaiako portutik goizeko 7:30ean aterako dira. Irteera neutralizatua izango da, antolakuntzak itsasoan aukeratutako puntu jakin batera heldu arte. 12:30erako ontzi denek Zumaiako portuan egon beharko dute.
Lehiaketa honetan parte hartu nahiko duten arrantzaleek uztailaren 29an eta 30ean eman ahal izango dituzte izenak, Anade elkartean bertan, 19:00etatik 20:30era bitartean.
Batzuek itsasoan egingo dute arrantza; beste batzuek, aldiz, lehorretik. Arrain txikien 46. lehiaketa ere abuztuaren 1ean jokatuko da. Heriotzarik gabeko arrantza lehiaketa hau goizeko 10:30etik 13:30era bitartean egingo da Zumaiako barran. Izenak ematerako orduan, arrantza egiterakoan, baita sari banaketan ere, osasun egoerak baldintzatutako neurri batzuk bete beharko dituzte parte-hartzaileek:
- Kofradiako aterpean kokatuko den mahian egingo da izena ematea
- Parte-hartzaile bakoitza eta bere arduradunak, maskarillakin aurkeztuko dira izena emateko mahi-burura.
- Bi metroko distantzia mantenduz itxaron beharko dute beraien txanda. Klub bakoitzarekin hitz egingo da, denak pilatu gabe.
- Mahaian gel hidroalkoholikoa eta desinfektantea egongo dira partaide denen eskura
- Parte-hartzaileek eskuak garbitu behar dituzte izena ematerakoan
- Antolatzailea maskararekin egongo da izenak hartzen, eta sarri garbituko ditu eskuak gelarekin
- Izena eman ondoren, parte-hartzaile bakoitza bere arrantza gunera joango da, eta hiru metroko distantzia mantenduko dute gune batetik bestera.
- Parte-hartzaileak ez dira pilatuko Kofradia inguruan emaitzak prestatzen diren bitartean
- Sari banaketak maskarillakin egingo dira eta beti ziurtasun neurriak mantenduz.