Azkenean lortu dute San Antoni bira ematea. Duela hiru urte antolatu zuen Getariako Triatloi Elkarteak itsas zeharkaldia herrian, eta lehen aldi hartan ezin izan zuten diseinatutako ibilbidea osatu itsas korronteengatik. Iaz, koronabirusak eragindako pandemiak baldintzatuta, bertan behera utzi behar izan zuten hitzorduan. Aurten, ordea, baldintza guztiak aldeko izan dira: itsasoa bare eta eguzkia lagun. Irteeran taldeka banatuta, baina, 229 lagunek osatu dute igeriketa proba, eta bizkorrenak Unai Agirre zarauztarra eta Ana Vega donostiarra izan dira.
Gaztetape hondartzatik Malkorbera egin dute zeharkaldia parte hartzaileek. Gizonezkoetan, multzotxo bat joan da aurretik denbora osoan, baina San Anton igaro eta barran sartzerakoan, Agirrek martxa bat gehiago sartzea erabaki du. Hala ere, orpoz orpo izan ditu Mikel Iriondo ondarroarra eta Jon Ulazia zumaiarra. Inork ez du eman amore bukaerara arte, eta lehia estua ikusi dute Malkorbe hondartzan zeuden zaletuek. Azkenean, zarauztarra nagusitu da 33 minututan osatuz igeriketa lehia; beste biak, aldiz, batera helmugaratu dira, bi segundora, Ulazia hirugarren izanik.
Ana Vegak eroso irabazi du emakumezkoetan, 33:17ko denboran, eta aitortu du zeharkaldian zehar ez zekiela garbi bere aurretik norbait ote zihoan ala bera zen buru. Gustura agertu da, eta asko gustatu zaio proba bera, nahiz eta arroka arteko ibilbideak nahikoa errespetu ematen zion. Bigarrena Helene Alberdi zumaiarra izan da; irabazlearengandik bi minutura iritsi da.