Urola Kostako Itaiak ekimen sorta prestatu du uda honetarako, aurrenekoz

(Urola Kostako Itaia)

Zumaian nahiz Zarautzen egingo dituzte ekitaldiak, uztailaren 22an, abuztuaren 11n eta abuztuaren 27an. Ekain bukaeran aurkeztu zuten Itaia Emakumeen Antolakunde Sozialistaren eskualdeko taldea.

Euskal Herrian duela bi urte sortu zen Itaia Emakume Sozialisten Sarea, eta iaz hartu zuen antolakunde izaera, Itaia Emakumeen Antolakunde Sozialista modura. Eskualdez eskualde antolatzeari ekin zioten orduan, eta Urola Kostan ere egin dute urrats hori: ekainaren 29an aurkeztu zuten Itaiaren eskualdeko taldea, Zarauzko Putzuzulo gaztetxean.

Emakumeen auzia "klaseen arteko gatazkaren dinamikan" kokatuta,  "emakume langileen zapalkuntza gainditzeko", "gizartearen antolaketa osoa gainditu beharra" dagoela azpimarratu izan dute Itaiako kideek. Zentzu horretan, "emakume langileek jasaten dituzten zapalkuntza zehatzak" lehen lerrora eramateko hautua egin dute, baita "emakume langileak klase borrokara batzeko baldintzak sortzekoa" ere, "emakumeen auziari ikuspegi komunistatik erantzun" ahal izateko. "Emakume langileen gaitasun politikoak areagotzeari eta subjektu politiko gaitu bilakatzeari" garrantzia berezia ematen diote, hala.

Urola Kostan ere lanean hasi dira, beraz, Itaiako kideak. Uda honetarako antolatu dute lehenengo ekimen sorta, eta hiru hitzordu jarri dituzte, uztailaren 22rako, abuztuaren 11rako eta abuztuaren 27rako. Zumaiako Torreberri gaztetxean izango dira abuztuaren 11ko ekitaldiak, eta gainontzeko bi egunetakoak, aldiz, Zarauzko Putzuzulo gaztetxean.

Abuztuaren 11n, asteazkenean, 18:00etan hasiko da Zumaiako saioa. Emakume langilearen heziketa politikoa eta antolakuntzaren beharra hitzaldia izango da lehenengo, eta gero, DJ Droga Purpurak girotuko du Torreberri.

Egitaraua

Uztailak 11, Zarauzko Putzuzulo gaztetxean

  • 18:00. Genero problematikaz hausnartzen hitzaldia
  • 20:00. Katarsia taldearen kontzertua

Abuztuak 22, Zumaiako Torreberri gaztetxean

  • 18:00. Emakume langilearen heziketa politikoa eta antolakuntzaren beharra hitzaldia
  • 20:00. DJ Droga Purpura

Abuztuak 27, Zarauzko Putzuzulo gaztetxean

  • 11:00. Identitate politikak eta borrokarako subjektua formakuntza politikorako mintegia
  • 14:00. Bazkaria
  • 18:00. Mirua taldearen kontzertua, akustikoan