Telmo Deunek bosgarren eta zortzigarren egin du Gipuzkoako Traineru Txapelketan

Aiora LarraƱaga Solaberrieta 2021ko eka. 13a, 16:00
Iazko udako argazki bat.

Beteranoen txapelketa jokatu ondoren, behe-lainoa sartu da Donostian eta gizonezkoen eta emakumezkoen txandak atzeratu egin behar izan dituzte. Bosgarren egin du Zumaiako emakumezkoen taldeak, eta zortzigarren gizonezkoenak.

Gaur, goiz-eguerdi partean, jokatu da Donostian Gipuzkoako Traineru Txapelketa, traineru denboraldiko lehen txapelketa ofiziala. Ez ohiko lurraldeko txapelketa izan da; batetik, orain arte Gipuzkoako txapelketa uztailean jokatu izan delako eta, bestetik, behe-lainoa dela eta gizonezkoen eta emakumezkoen txandak atzeratu egin behar izan dituztelako.

Telmo Deun Arraun Elkarteko emakumezkoen eta gizonezkoen taldeek parte hartu dute lehian, eta bosgarren eta zortzigarren postuan sailkatu dira, hurrenez hurren. Emakumezkoen txapelketa Donostia-Arraun Lagunak taldeak irabazi du. Zumaia 6. txandan aritu da Tolosaldearekin, San Juanekin eta Hibaikarekin batera, eta 11:20,88ko denbora egin du.

Gizonezkoen lehian, bestalde, Hondarribia nagusitu da gaurko txapelketan. Bidasoako taldeak gizonezkoen hirugarren txandan egin du arraunean, eta hasieratik estropadaren buruan jarri da. Zumaia 3. txandan atera da Getariarekin, San Pedrorekin eta San Juanekin; 21:07,60koa izan da egin duen denbora.

Hona hemen sailkapenak:

GIZONEZKOAK
1.- Hondarribia 20:01,27
2.- Donostiarra 20:08,30
3.- Orio 20:25,73
4.- San Pedro 20:36,49
5.- Getaria 20:48,39
6.- Zarautz 20:51,95
7.- San Juan 20:57,75
8.- Zumaia 21:07,60
9.- Lapurdi 21:48,01
10.- Mutriku 21:59,85
11.- Hibaika 22:15,57
12.- Ilunbe 23:55,24

EMAKUMEZKOAK
1.- Arraun Lagunak 11:03,40
2.- Orio 11:09,89
3.- Tolosaldea 11:15,75
4.- Hondarribia 11:19,09
5.- Zumaia 11:20,88
6.- Donostiarra 11:23,76
7.- Hibaika 11:29,25
8.-  San Juan 11:33,78
9.- Zarautz 11:57,31
10.- Lapurdi 12:36,55