Eusko Jaurlaritzako Osasun Sailak emandako datuen arabera, beste zortzi positibo detektatu zituzten atzo Urola Kostan. Zumaian positibo bat izan zen atzoko datuen arabera. Hamar kasu izan dira herrian azken zazpi egunetan, eta positibotasun tasak ehunetik gora jarraitzen du; 132,29ko tasa du herriak gaur-gaurkoz.
Zortzi kasu horietatik ia erdia, hiru, Zestoan detektatu zituzten. Aurreko bost egunetan ez zuten kasurik zenbatu herrian, eta bost dira zazpi eguneko epean Zestoan atzemandako kasuak.
Eskualdeko beste bost herritan atzeman zituzten atzo COVID-19arekin lotutako kasuak: Aian, Azkoitian, Azpeitian eta Zarautzen positibo bana zenbatu zituzten astelehenean. Eskualdeko herri guztiak ere eremu gorritik urrun aurkitzen dira une honetan.
Hego Euskal Herrian nabarmen egin du gora positiboen kopuruak. 462 kasuren berri eman zuten atzo Eusko Jaurlaritzako eta Nafarroako Gobernuko osasun sailek. Araba, Bizkai eta Gipuzkoari dagokionez, 9.259 PCR eta antigenoen proba egin zituzten, eta horietatik 394k positibo eman zuten; bezperan 286 kasu positibo izan ziren hiru lurralde hauetan. Hala, positibotasun tasa %4,3koa zen atzo.
Araban 89 positibo eman ziren, 187 Bizkaian eta 116 Gipuzkoan, bezperan baino 60 gehiago. Beste erkidegoetako bi lagunek ere positibo eman zuten. Ospitaleratuei dagokionez, beste 34 lagun ingresatu zituzten atzo Osakidetzako erietxeetan. ZIUko unitateetan 98 lagun zeuden atzo ospitaleratuta.
Nafarroan ere gora egin du positiboen kopuruak, Nafarroako Gobernuak aurreratutako datuek diotenez. 2.130 proba egin zituzten atzo, eta horietatik 68 izan ziren positiboak. %3,2ko positibotasun tasa zuten atzo Nafarroan.