Kultur arloa indartzeko helburuarekin sortutako Beste bat! zikloaren barruan bertsoen eta flamenkoaren arteko uztartzea, eta Mikel Laboaren errepertorioaren gainean egindako jazz moldaketak entzun dira abenduaren amaieratik aurrera Zumaian. Gaur rockak hartu du protagonismoa, Liher laukoteak Zumaienako aretoan emango duen kontzertuarekin.
Lide Hernando abeslari eta gitarristaren bueltan sortutako proiektua da Liher. 2015. urtean sortutako taldea, eta egun Iñigo Etxarri (gitarra, koroak), Joshka Natke (baxua, koroak) eta Ander Berzosa (batería) biltzen dira Liher izenaren azpian. Hiru disko atera ditu urte hauetan, horietatik azken iaz plazaratutako Hemen herensugeak daude. "14 abestiz osatutako transmedia proiektua da, musika ez ezik ilustrazioa, narrazioa eta ikus-entzuneko materiala biltzen dituena. Pieza guzti horien baturak amodioa, bortizkeria eta emakumearen bakardadea gai nagusi dituen fikziozko istorio bat kontatuko digute", dio taldeak disko honen inguruan.
Kontzerturako sarrerak turismo bulegoan daude salgai, 5 euroan. 18:00ak arte egongo da sarrerak erosteko aukera, eta antolakuntzatik esan dutenez, aretoan bertan ez dira salgai jarriko.