Eusko Jaurlaritzak eta Nafarroako Gobernuak emandako azken datuen arabera, 10.408 PCR eta antigeno proba egin ziren atzo Araban, Bizkaian, Gipuzkoan eta Nafarroan, eta %6k eman zuten positibo aurreneko hiru lurraldeetan, eta %7,4k, berriz, Nafarroan (Gipuzkoan 207 positibo berri zenbatu zituzten, Nafarroan 130, Araban 88 eta Bizkaian 216).
Zumaian lau egun jarraian kasu berririk gabe egon ondoren, azken bi egunetako datuetan gorakada egon da: herenegun kasu bat agertu zen, eta atzo, lau. Oraingoz eremu gorritik urrun dago herria, baina datozen egunetako datuek erakutsiko dute joera goranzkoa den, ala egun zehatz bateko kontua.
Urola Kostari dagokionez, guztira 30 kasu berri atzeman dituzte: aipatutako lau kasu Zumaian, sei kasu Zarautzen, hiru Zestoan, lau Aizarnazabalen, bina Azkoitian eta Orion, eta bederatzi Azpeitian. Azken horrek 500etik gorako intzidentzia metatuaren tasarekin jarraitzen du, 524,74. Azpeitiarekin batera, Aizarnazabal da eskualdean larrien dagoen herria. Azken bost egunetan hamabi kasu berri atzeman dituzte han, eta horregatik, Aizarnazabalgo Udalak herriko liburutegia eta gimnasioa eta herriko tabernak ixtea agindu du.
Gaur-gaurkoz, bi herri horietan daude itxita ostalaritza establezimenduak (Aizarnazabalen, udalaren bandoak agintzen duenean itxiko dira).
Beste muturrean, azken orduetan positibo berririk ez duten herriak ere badira eskualdean: Aia, Beizama, Errezil eta Getaria, hain zuzen.
Bezperako datuak kontuan hartzen badira, hau da, asteartean argitaratutakoak, kasuak bikoiztu egin dira eskualdean, hamabost positibo berri atzeman baitzituzten orduan. Igoerak ia herri guztietan egon dira, nabarmenenak Azpeitian (lautik bederatzira), Zestoan (kasurik ez edukitzetik hiru izatera), Azkoitian eta Orion (kasu berririk ez edukitzetik bina izatera) eta Zumaian (bitik laura).
Hego Euskal Herriko datuei erreparatuta, aurreko egunean 6.778 PCR eta antigeno proba egin zituzten lau lurraldeetan, eta herrialdeka, Bizkaian 150 izan ziren zenbatutako kasu berriak, Gipuzkoan 130, Nafarroan 102, eta Araban 62.
Ospitaleetako egoerari dagokionez, azken datuen arabera 79 pertsona daude ZIUn ospitaleratuta Osakidetzak kudeatzen dituen egoitzetan, eta 284 lagun daude guztira ospitaleratuta. Nafarroako daturik ez dago momentuz.