Edurne Egaña GBBko burukide izango da datozen lau urteetan

Anartz Izagirre 2020ko aza. 28a, 13:00

Atzo, ostirala, aukeratu zituzten Gipuzkoa Buru Batzarreko presidentea eta burukideak Gipuzkoako Herrialde Batzarrean. Joseba Egibar izango da Lurralde Zuzendaritzako burua, eta hamalau burukide izango dira; tartean, Edurne Egaña zumaiarra.

Gipuzkoa Buru Batzarrak zuzendaritza talde berria izango du datozen lau urteetan; izan ere, EAJren Gipuzkoako Herrialde Batzarra egin zuten atzo, ostirala, Donostian, eta talde eraberritua aurkeztu zuten bertan. Batzarrak aho batez onartuta, Joseba Egibar izango da beste lau urtez Lurralde Zuzendaritzako burua; horrez gain, Uri Batzarretako ordezkariek zuzendaritzako parte izango diren lurraldeko hamalau burukide aukeratu zituzten, eta horien artean dago Edurne Egaña zumaiarra.

Bailara guztietako burukideak izango ditu lagun zumaiarrak, horietatik denak euskaldunak eta gehienak emakumeak. Atzoko batzarrarekin batera amaitu zen EAJren barne aukeraketa prozesua Gipuzkoan, eta EBBko presidentea eta zortzi burukideak aukeratzeko botoa ere eman zuten bertan.